JALAK MANGAN KEBO (Kumpulan Geguritan Pendidikan Budi Pekerti)
JALAK MANGAN KEBO dening Trimo
JALAK MANGAN KEBO
Antologi Geguritan “JALAK MANGAN KEBO” dening Trimo
Penulis : Trimo
Penerbit : Dewan Bahasa Jawa Kabupaten Blora
Terbitan : 2021
Tinggi Buku : 21 cm
Hal : 70
ISBN : 978-623-7897-29-3
Gurit ke 21
JALAK MANGAN KEBO
Jalak mangan kebo
ora lumrah
barang ora lumrah
angger nggenah
bisa dadi kaprah
senajan salah
Jalak mangan kebo
aran jalak kuwalat
jalaran jalak butuh kebo
kebo uga butuh jalak
ya bener jalak mangan kebo dadi warek
nanging sesuk lan saklawase
jalak lan kebo wis ora ana ceritane
Gurit ke 16
LATHI
Lathi
landhepe ngungkuli glathi
glathi mung bisa kanggo iris-iris buncis
kekethok-kethok lombok
rajang-rajang brambang bawang
ya mung kadhang-kadhang ngiris driji
drijine wong sing kurang ati-ati
nanging ora suwe mesthi mari
Lathi
landhepe ngungkuli glathi
senadyan ora bisa kanggo iris-iris buncis
kethok-kethok lombok
rajang-rajang brambang bawang
nanging landhep kanggo ngiris-iris ati
tatune angel tambane
pingget nganti tekan selawase
jenenge lara ati
tatu merga saka lathi.
167 total views, 3 views today